عـــمــاره 3 ................ عــمــر طـــاهـــر

عمارة 3

في الدور الاول اصحابي
وجيراني قاعدين في التاني
وابوياوامي في الدور الرابع
وانا ساكن في الدور العاشق
انا ساكن في الماضي الغامق
انا سافل بيحب الدنيا
هربان من حكم بتأبيده

في الدور الاول سألوني
عن اسمي وعن سر جنوني
عن شجره تحت الشباك
عن جردل على سور البير
ع الخطه الخمسيه الجايه
عن بنت بتلمع في عينيا
عن ورده وشاديه وفيروز
عن لحظه باتحول فيها
من ميكانيكي الي اراجوز
عن قهوه سكر مضبوط
عن شله رايحين الحفله
وماحدش راجع مبسوط
عن حرحي اللي مابفتحهوش
عن صاحب رمه ومغشوش
نزلني ف ماطلعتوش
عن نمره تليفون البيت

في الدور التاني سألوني
عن واحده بتجيلي الشقه
عن ازمه حنيه مفاجئه
ف شباك صاله المفتوح
عن ضحكه مابتقولش كتير
وقميص اتعلق مجروح
وسلام متوتر مكسوف
وقالوا لي احنا عارفينك
قلتلهم طب ماانا معروف


في الدور التاني شدوني
م الياقه لصلاه الجمعه
من قلبي شاكين ف حريقه
من نومي بكلاكس الباص
في الدور التاني سألوني
عن حيره كشاف النور
عن عقده في سلك التليفون
وقالوالي مابتردش ليه


في الدور الرابع ربوني
بالخمسه على وشي ادوني
في الشقه لوحدي وسابوني
وقالوا لي ماتفتحش الباب
في الدور الرابع بعتوني
اتعلم وارجع بشهاده
مارجعتش بس اتعلمت
اتعلمت لاني امنت
وبادفع تمن اللي ا تعلمته
وغيابهم عني اتحملته
وغيابي عنهم بقى عاده
امي قالت لي بطل قهوه
وقهوه ابويا ساده


وانا راجع للدور التاني
في الدور التاني يا جيراني
انا بكره ماشي ومش راجع
يا معادي ليلك بقى ساقع
بقى اسقع من الوحده ونارها
انا صاحي في ليلها ونهارها
فكرني حلوها بمرارهاوباصرخ بس ماحدش سامع



وانا راجع للدور الاول
في الدور الاول ارشيفي
رجاله مقاسمها رغيفي
مقاسمها ورقه بعشرين
عدويه و ورده وجاهين

في الدور الاول اصحابي
واقربهم ليا الخاينين
وانا ساكن في الدور العاشق
انا ساكن في الماضي الغامق
انا سافل بيحب الدنيا
هربان من حكم بتأبيده
وباواجه ربنا بايماني وباواجه نفسي بقصيده